Tekst efter Nielsen, Ribe Oldemoder anf. st.
In nomine sancte et individue trinitatis amen. ♦
Ad decorem domus dei et cultum divinum magis ampliandum nos Petrus dei gratia episcopus Ripensis cum concilio et consensu dilecti capituli nostri Ripensis statuimus et ordinamus infrascripta inviolabiliter observanda. ♦
Primo quod quilibet canonicus residens, qui se absentaverit a choro sine legittimo impedimento in aliquo summorum festorum, solvat pro quolibet festo i solidum grossorum in pena. ♦
Item quod quilibet canonicus residens, qui fuerit in civitate, qualibet sexta feria, quando non est festum populi, veniat ad capitulum ante finitam primam pro negociis ecclesie pertractandis, nec inde exeat sine licencia capituli, antequam negocia dicta sint pertractata, sub pena i albi pro quolibet die capitulari. ♦
Item quod quilibet clericus nostre dyocesis volens ad gradum sacerdocii promoveri, teneatur vicariatus officium in ecclesia nostra Ripensi, dum per cantorem et capitulum fuerit requisitus, per duos annos, salvo sibi salario consweto, in sacris ordinibus adimplere, nisi illi, quos ad servicium nostrum duxerimus advocandos. ♦
Item quod quilibet sacerdos in civitate Ripensi vel ejus suburbio commorans, dummodo alias non fuerit legittime impeditus, teneatur in summis festis, horis divinis, scilicet primis, vesperis et secundis ac summis missis tempestive ante processionem in choro ecclesie nostre Ripensis finaliter interesse in habilibus convenientibus, ac eciam in diebus dominicis ad processionem sollempnem, quilibet sub pena i solidi Lubicensis de absencia cujuslibet hore. ♦
Ut autem hec statuta debitum sorciantur effectum, execucionem horum statutorum domino cantori, qui pro tempore fuerit, committimus, dantes sibi plenam auctoritatem a delinquentibus et rebellibus penam predictam exigendi et eos sub pena privacionis ab officio cohercendi.
In cujus rei firmiorem evidentiam sigillum nostrum una cum sigillo nostri capituli presentibus duximus apponendum. ♦
Data et acta sunt hec in domo nostra capitulari anno domini mcd xiiii, quarta feria pasche. ♦
I perioden frem til 30. juni 2021 vil redaktionen udelukkende udarbejde tekster.