1415. 19. februar. Konstanz

Tekst

Archiepiscopo Lundensi. Super gregem dominicum [etc.]. Sane petitio pro parte prioris et conventus domus opidi Hwaldynbec, alias dicti Landescrone, ordinis fratrum b. Marie de monte Carmeli Lundensis diocesis continebat, quod olim Ericus Dacie Svecie et Norvegie rex, cupiens terrena in celestia ac transitoria in eterna felici commercio commutare, pro anime sue salute ac ejusdem cultus augmento priori et fratribus prefatis locum ad id congruum et honestum et ad ipsum legitime pertinentem in opido prefato pro ipsorum habitatione et usu pia largitione donavit, ipsique prior et fratres, licet de facto, pro hujusmodi habitatione et usu locum acceptantes, eandem novam domum inibi cum ecclesia cimiterio campanili campana ortis ortaliciis et aliis necessariis officinis etiam Christi fidelium accrescentibus suffragiis edificari fecerunt, excommunicationis sententiam in tales generaliter a jure promulgatam dampnabiliter incurrendo, ipsamque ecclesiam alias tamen rite procurarunt auctoritate ordinaria consecrari, similiter de facto. Quare pro parte dictorum prioris et fratrum nobis fuit supplicatum, ut eis ac ipsorum statui super hiis oportune consulere dignaremur. Nos itaque, qui divinum cultum vigere et etiam adaugeri nostris temporibus intensis desideriis affectamus . ., fraternitati tue . . mandamus, quatenus eosdem priorem et fratres, si hoc petierint, ab hujusmodi excommunicationis sententia, quam incurrerunt, ut prefertur, auctoritate nostra hac vice dumtaxat absolvas in forma ecclesie consueta, injunctis inde ipsis pro modo culpe penitentia salutari et aliis, que de jure fuerint injungenda, et nichilominus cum ipsis super irregularitate, si quam hujusmodi sententia ligati missas et alia divina officia, non tamen in contemptum clavium, celebrando vel immiscendo se illis quomodolibet contraxerint, prout juris fuerit, eadem auctoritate dispenses ac aboleas omnem inhabilitatis et infamie maculam sive notam per ipsos premissorum occasione contractam, et nichilominus, si per te absolutionem dispensationem et abolitionem predictas fieri contigerit, ut prefertur, tuque post informationem diligentem per te super hiis eadem auctoritate recipiendam hujusmodi donationem edificationem et consecrationem alias fore inveneris rite factas, illas et quecunque inde secuta auctoritate apostolica confirmes, supplendo omnes defectus, si qui etiam forsitan alias intervenerint in eisdem, et insuper fratribus singulis, quos pro tempore in domo residere contigerit antedicta, ut omnibus privilegibus, quibus alii dicti ordinis fratres in aliis ipsius ordinis domibus sive locis commorantes pro tempore etiam de consuetudine sive jure gaudeant, gaudere valeant, eadem auctoritate concedas . . . Datum Constantie 11. kal. martii anno 5.