Erbaren und wisen mannen, heren borgermestern und radmannen der gemeinen stede in Lyfflande, unsen leven besunderen vrunden, radessendeboden der stede van der Dutschen hense, nu tor tid binnen Lubek vorgaddert, und de raet van Lubeke.
Unsen vruntliken grut und wes wi gudes vormogen.
Leven vrunde.
Uns hebben vorstan laten etlike, wo gi id deme kopmanne to grotem vorvange und schaden si de eninge juwer Lifflandeschen stede, alse dat de Dutsche kopman scholen nicht soken to Novgarden und de Nu mit gude, ok nicht kopslagen mit den van Novgarden bi vorlust des gudes, ok of dat imand vore sunder gud, de en scholde sines brokes nicht weten.
Dar up hebbe wi vorgenomen, wo juwe rades sendeboden, to der Pernow up Purificationis Mariae vorgaddert, to den van me Sunde dar van gescreven hadden, dat de van deme Sunde brochten vordan vor de stede, de latest weren to Copenhaven, und de stede ju do en boden, under deme secrete der van me Sunde, dat gi de eninge henneleden bette to der negesten dachvart, de se ju do kundegeden, dat se werden scholde uppe Pinxsten binnen Lubeke, dar gi denne mit den steden vurder umme spreken mochten, welken dach gi nicht hebben besant.
[.....]
Screven under der van Lubeke secrete, des wi samentliken hiir to bruken, up sunte Egidius dage, anno XVI.
I perioden frem til 30. juni 2021 vil redaktionen udelukkende udarbejde tekster.