Post salutacionem.
Hochgeborne vorste, gunstige here.
Juwer herlicheid unde juwes vedderen, greven Hinrikes van Holsten, breve, dar ane juwe herlicheide bidden, dat wii vere stede dar to vogen willen, de over juwen degedingen stan und, efft des behoff sii, juwe schedeslude wesen mogen mit juwen heren und vrunden etc., hebbe wii wol vornomen.
Begerende juwer herlicheid to wetende, dat wii bynnen Lubeke vorgaddert enes gedregen hebben, dat wii, Gode to love, umme des menen besten und vredes und guder zate willen der lande, zenden willen uppe den dach, den me, umme schelinge und twidracht willen twisschen dem irluchtigesten heren, koninge Erike van Dennemarken etc., und juwer herlicheid wesende, holden scal to Sleswiik uppe sunte Johannis dach baptisten to middensomere erst to komende[1] , und mit gantzem vliite truweliken dar to helpen, dat de vorscrevene schelinge und twidracht vormiddest gnade und hulpe des gevers alles guden in vruntlicheit edder rechte moge gesleten werden und to gude zate gebracht, alzo vere de yenne, de wii dar zendende werden und de se mit sik bringen up den vorscrevenen dach, und to und aff, to watere und to lande, vor jw und alle den jennen, de umme juwer und juwes vedderen, greven Hinrikes herlicheid, willen don und laten willen und scholen, mogen zeker und velich wesen, und der geliik ok de jennen, de uns bynnen dem dage vorsokende werden, ok mogen velich sin.
Juwe herlicheid beware God to langen zaligen tiiden, bedende over uns.
Und uns desses eyn unvortogerd antword to scrivende by dessem boden.
I perioden frem til 30. juni 2021 vil redaktionen udelukkende udarbejde tekster.