1418. 18. november. Segeberg slot

Tekst

Wy Hynrick van Gottes gnaden, forste tho Stormarn greue tho Holsteen vnd tho Schowenborch entbeeden heyel an dem Heren.

Alle den yennen de dessen breeff seen edder horen lesen begeren wy witlick vnde apenbahr to wesende vpp dat de dynge de dar scheenn yn der tytt, mit der tytt nicht en vergaen so ys des noeth und behoeff dat men de dynge mit t{ue}chenissen vnd scrifften beueste, hyrumme so synn vor vns gewesen vnse leeue getruwen borgemester vnd raetmanne vnser stadt Segeberge vnde hebben vns to bekennen gegeuen erer stadtrecht, frygheit, schede vnd begifftinge alse enn vann vnsenn vorolderen vnd van vnseme vader allersaliger gedechtenisse gefrieth vnd gegeuen ys welcker giffte vnd frigheit vngeserigde beseglde breue wy andechtigen geseen vnd gehorth hebben, ynn latiniscken worden gescreuen vnd ynn den dudteschen van worden to worden aldus ludende.

[.....]

So stendichen wy vnd beuestigen, geuen vnnd g{ue}nnen denn borgemesterenn, raetmannen vnnd denn borgerenn vnnser vorgeschreuenn stadt dat s{ue}lue recht, frigheit, schede vnnde begifftinge to verbeteringe der stadt to hebbende vnnd to bruckennde alse se wennte an vnns gehatt vnnd gebrucket hebbenn.

Und uppe dat sodanige gyffte vnnd frigheit stede, vast vnd vntobrackenn bliue; so hebbe wy greue Hynrick vorbenomed vnnse jngesegell vor vnns vnnse eruen vnnde vnnse nakomelinge mit witscopp vnnd wolberadenen mode an dessenn breeff gehenget lathenn; de degeuenn vnnde schreuenn is upp vnsem slathe Segeberge, na Gotts geborth veerteinhundert yar darna an dem achteinden yar, an s{ue}nte Elsebenn auende.

Dar an vnd ouer gewest synn to groterer wittlicheit vnnse leuen getr{ue}wen de hochgeborne vnnse leue vedder Alff hertoge to Sleswick, her Herdinck Stacke ridder, her Herman Buren domhere to Hamborch, Heunecke Ratlow vnse droste, Hinrick Brockdorpp vnse marschalk, Hinrick Kule , Henninck Meynestorpp knapenn, vnnde vele andere t{ue}chwerdige l{ue}denn etcetera.