Tekst og arkivalske oplysninger efter APD l.l.
Cum ecclesia metropolis Lundensis in regno Dacie situata adeo sit <in>[1] suis facultatibus diminuta, ut taxam 4000 fl. auri de camera ipsi camere apostolice sacroque collegio dominorum cardinalium, necnon communia et minuta servitia, sacram ac alia emolumenta notariis diaconibus subdiaconibus et officialibus sedis apostolice clericisque dicte camere gentibus armorum ac cursoribus sedis apostolice seu quibusvis aliis dictorum communium et minutorum seu sacre participibus .. secundum taxam predictam solvere nequeat sine gravi ipsius detrimento, ac propterea s. v. ad Erici Dacie Svecie Norvegie Gottorum Slavorumque regnorum regis recolendeque memorie Petri olim archiepiscopi et capituli dicte Lundensis ecclesie super hoc supplicantium instantiam predictam 4000 fl. auri predicti taxam tamquam dicte Lundensi ecclesie nimium onerosam ad summam 2000 fl. similium de consilio et assensu predictorum dominorum cardinalium nuper reduxit ac ipsam Lundensem ecclesiam ad dictam 2000 fl. summam distaxavit ac voluit et vive vocis oraculo tam domino vicecamerario quam notariis diaconibus et subdiaconibus dicte sedis aliisque officialibus et clericis camere predicte injunxit, ut ipsi amplius et de cetero in eorum obventionibus, juribus et emolimentis secundum dictam taxam 2000 fl. de camera, ac si dicta Lundensis ecclesia a primeva ordinatione ad summam 2000 fl. taxata fuisset, contenti forent nilque penitus occasione dicte antique 4000 fl. taxe sic reducte peterent seu reciperent quovis modo, littereque apostolice pro Petro olim episcopo Ripensi ad dictam ecclesiam Lundensem postulato et sibi nuper per e. s. v. de eadem proviso quoad minutam notariorum et bullariam secundum dictam 2000 fl. taxam extiterant expedite et ad cameram apostolicam deportate.
Et licet premissa, ut creditur, predictis dominis vicecamerario officialibus clericis notariis sint satis nota, nonnulli tamen asserunt in talibus simplici verbo vive vocis oraculo s. v., ut premittitur, facto de consuetudine Romane curie sine aliis probationis amminiculis minime fore standum, ac propterea ipse littere in camera apostolica impresentiarum remanent impedite.
Supplicatur igitur pro parte Erici regis, Petri postulati et capituli predictorum, quatenus supradictas et imposterum, quando dicte Lundensis ecclesie vacatio occurrerit, alias ratione dicte ecclesie conficiendas litteras secundum 2000 fl. taxam predictam tam quo ad cameram apostolicam quam dictum sacrum collegium dominorum cardinalium et bullariam ceterosque notarios officiales diacones subdiacones clericos armorum gentes et cursores aliosque communium et minutorum servitiorum seu sacre participes .. expediri mandare voluntatemque s. v. fore et existere dictas aliasque in futurum, ut premittitur, conficiendas litteras perinde juxta dictam 2000 fl. taxam peramplius expediri debere, ac si ipsa Lundensis ecclesia a primeva taxatione dumtaxat ad 2000 fl. auri de camera <taxata fuisset>[2] dignemini declarare ....
Fiat. O.
Datum Florentie non. martii anno 2.
I perioden frem til 30. juni 2021 vil redaktionen udelukkende udarbejde tekster.