Tekst efter Akten und Rezesse l.l.
Johannes van Godes unde des Romisschen st{uo}les gnaden der hilgen kerke to Rige ertzbisscop, unde Dyderik van densulven gnaden bisscop to Darpte.
Unsen {oe}tm{uo}digen d{ee}nst myt begher heyls unde alles gudes in Gode vorgescreven.
Allirdorchluchtigeste vorste, holde gnedige g{uo}nner unde here.
Juwer koninghliker l{uo}ttersamicheit beghere wy to weten unde d{oe}n k{uo}nt in desser scrifft, wo dat de acbare hochwerdige here, here Zyvert Landere van Spanheym , meister des erwirdigen D{ue}tschen ordens to Lyfflande, in vorghaderinghe unde jegenwardicheit unser, unser capittele, ritterscap unde stede desses gemeynen landes up ghevinghe desses breves umme scheffte unde n{uo}t willen dessulven landes myt uns tosamende geweset is, dar he vor uns allen vorger{uo}rt nach anderen w{oe}rden myt {ee}rnstliker bekummernisse unde besweringhe synes gemotes hefft to dirkennende geven, dat he tegen juwe koninghlike majest{ae}t sulle scheddichliken bel{uo}t unde besecht sin, in welker mathe he van dersulven juwer koninghliken majest{ae}t als van heren Johannis wegene van Dolen zeliger dechtnisse sulle w{oe}rt gev{uo}rt unde gesproken hebben, de juwe koninghlike gr{oe}tmechticheit to myshage unde unwillen sulle genomen hebben etcetera.
Allirdorchluchtigste[1] hochgeboren vorste unde holde here, myt sodaner beludinghe hefft sik de desulve erwirdige here meister s{uo}nderliken hoge bekummert unde vor uns, unsen capittelen, ritterscap unde steden vorger{uo}rt unde velen guden anderen luden geistlik under werlik strenghliken sine untschult van der vorger{uo}rden bel{uo}dinghe wegene to sprekende so hoge unde {ee}rnstliken vorantwardet, dat wy myt en anderen em des gentzliken to beloven unde to belovende steit ane alle twyvel, dat sodane w{oe}rt, dar he mede tegen juwe koninghlike majest{ae}t bel{uo} is, edder jenige andere w{oe}rt, de juwe l{uo}ttersamicheit wedder ene to ungnaden bewegen mochten, n{ye} ud sinem m{uo}nde geganghen sin, unde em nicht myt der w{ae}rheit overgesecht sin unde nicht hogers en gh{ee}rt, men dat he den under ogen seen mochte, de em sodane rede overgev{uo}ret hefft; tegen den welde he sik myt sodaner antworde unde entleddeghinghe stellen, dat men sine unsch{uo}lt in den saken egentliken dirkennen solde.
Wor{uo}mme, allirdorchluchtigeste vorste unde here, wente wy an dem ergenanten erwirdigen heren meistere vornomen hebben, dat he etzwas bevoren sine erbare boden by juwer koninghliken majest{ae}t gehat hefft, ene to entschuldigende in dessen vorger{uo}rden saken, so bidde wy juwe koninghlike l{uo}ttersamicheit unde gnade demodichliken myt allem[2] vlite, dat gi sodaner vorger{uo}rden beludinghe wedder densulven erwirdigen heren meister nicht geloven unde em juwer unhulde unde vordechtnisse van der wegene gnedichliken vorlaten willen gentzliken ud juwem herten; wente wy n{ye} an em hebben dirvaren kont, den dat he alle wege is begherende wesen unde beghert andechtichliken, juwer koninghliken l{uo}ttersamicheit unde juwen riken unde landen to denende, to willen unde behechlik to sinde nach sinem unde sines erwirdigen ordens gantzem vormoge.
To eyner {oe}rk{uo}nde unde w{ae}rheit desser vorgescreven p{uo}ncte hebbe wy Johannes ertzbisscop unde Diderik bisscop vorgenant unse secreta heten hanghen an dessen breff.
Gegeven to dem Walke nach der geb{oe}rt Cristi verteynh{uo}ndert jar darna in dem eynen unde twintigesten jare up den negesten mydweke vor dem sondage in der vasten, als men singhet to dem ambeghinne der missen Oculi etcetera.
I perioden frem til 30. juni 2021 vil redaktionen udelukkende udarbejde tekster.