Vruntlike grote to voren.
Ersamen leven vrundes.
Wellet weten, dat ik dessen jegenwardigen brefwiser, Gunnar , mime deiner, befolen hebbe ein werf ju to berichten, also umme einen, de is Purin genant, de is mi untweken ut den riken und ute deme rechte van Sweden.
He is mit ju beseten in juwer stat, und he is mi und minen kinderen vele schuldich.
Hir umme so bidde ik ju, leven vrundes, dat gi mi den vorgescreuen Purin to rechte stellen, und dat sine under ein recht besetten so lange, dat ik edder min vulmechtige bot dar to ju komen kan, dat mit rechte to vorfolgende.
Hir bi doet, also ik ju vele gudes to belowe, dat wil ik gerne kegen ju vorschulden in eime desgeliken edder beteren, wor ik mach.
Hir van begere ik ein antwart van juwer ersamheit mit dessen brefwiser, mime dener.
Gode almechtige siit befolen to ewigen tiiden.
Gescreuen to Wyborch, an unser leven vrouwen avende in der vasten.
Bi mi Kersten Nickelson , ritter.
I perioden frem til 30. juni 2021 vil redaktionen udelukkende udarbejde tekster.