1423. 10. august. Plön slot

Tekst

Wy Hinrick , Adolff unde Gherd , brodere, van Godes gnaden hertogen to Sleswyck, vorsten to Stormeren, unde greven to Holsten unde Schowenborgh, bekennen unde betughen openbare in dessen breve, dat wy dem erwerdhigen in God vadere, hern Johanne , bischupe to Lubecke, unsern leven sunderghen vrunde, syn stichte, beyde lude unde gut, umme synes vlytighen arbeydes wyllen, unde sunderghee woldat, de hee uns und unsen landen truwelcken heft bewiset, an unse beschermynghe entfanghen unde nommen hebben unde willen ene unde syn stichte truwelcken beschermen, vorbitten und vordeghedinghen, teghen allerleye welde unde unrecht, na al unsen vormoghenden, udghenomen, wes dat mene land deyt.

Hierumme bidde wy unde beden alle denjennen, de in unsen landen unde herscuppen vorbenannt beseten syn, unde de umme unsen willen doen unde laten willen, dat se den ergenannten erwerdighen vadere, syn stichte, lude unde gud, nerghen ane beschedeghen, edder myt welde anverdighen, edder vorunrechten.

Were over dat, dat yemend dede dar enbouen, dat wolde wy richten, unde keren woe wy mochten.

Desses to tuchnisse, hebbe wy hertogen vorbenannt unse jnghesegele wytlichen laten henghen an dessen bref, de geschreven unde gegheven ys up unsem slote to Plone, na Godes bord verteyn hundert jar, darna in deme dre unde twyntighesten jare, in sunte Laurentius daghe des hilghen mertelers.