Tekst efter Aa.
Serenissimo principi domino Erico dei gracia regi Dacie Swecie Norwegie Gottorum Sclavorum regi et duci Pomeranie fratri nostro carissimo Wladislaus eadem gracia rex Polonie Lijthwanieque princeps supremus et heres Rusie salutem et fraterni amoris continuum incrementum ♦
Serenissime princeps frater noster carissime littere fraternitatis vestre nobis per strenuum Swanthosch exhibite quas grate accepimus continebant quod fraternitas vestra iter conceptum ad serenissimum dominum Sigismundum deigracia Romanorum regem semper augustum et Hungarie Bohemie etcetera regem fratrem utriusque nostrum carissimum utique continuare intenderet in reversione vero ad metas et confinia regni nostri juxta relacionem Swanthosch predicti vellet descendere desiderantes sub fraterni amoris dileccione nostram benivolenciam cum consensu voluntatis pariter et securo conductu ad ea nobis prestari ♦
Serenissime princeps frater noster carissime genitor vester felicis recordacionis terras dominiorum nostrorum et regni libere et sine quovis impedimento peragrabat neque a nobis alicujus securitatis unquam litteras requirebat / sed et cuilibet amicorum vestrorum liberum est easdem secure transmeare ♦
Nichilominus ex quo id vestre fraternitatis scripta requirunt salwm conductum nostrum in litteris cum sigillo appenso pariter cum strenuis et nobilibus nostris Mathia Labijszkij pallatino Brzestensi capitaneo in Junivladislavio consiliario Vincencio de Schamotuli / Nicolao Tumigrala de Schova militibus fidelibus dilectis in obviam vestre fraternitati ad metas regni nostri destinamus qui illico dum per vestram fraternitatem suscipientes secure conducent sed et aliorum prelatorum ac baronum nostrorum quorumcumque vestre fraternitati placeret . presencia pro votis ejusdem et conductu semper prompta esse debet et parata ♦
Datum in Leopoli feria secunda proxima ante sancti Galli etcetera ♦
I perioden frem til 30. juni 2021 vil redaktionen udelukkende udarbejde tekster.