1424. 4. juni.

Tekst

Van Godes gnaden wy Alff , hertoge to Schlesswick, greve to Holsten, Stormarn unde tho Schowenborch bekennen apenbahr an dessem breue, vor als weme, dat vor uns geweset is herr Vollert Beker , unse capellan tho Segeberg, unde hefft vor uns ghehat unser leuen modder breff, vrowe Annen , wandages greue Alues hussfrowen, beide seeliger dechtnisse, de ungesehriget unde untobraken was, dar se Schenckine , erem vogede, unde syne eruen ane beghifftiget hadde, mit dree morghen ackers tho Greuenkope, in deme dorpe beleghen, de an er van Tideke Wisen mit rechte vorbroken weren, unde Schenckin des vorben. Tideken Wisen eruen vor den acker ere n{oe}ghe vore maket hadde, de vort van rechtes erfualles wegen an herrn Vollerde erben mit rechte voruallen is, unde Schenckines kindern dar vul vore daen hefft, alse deme rade unser stadt tho deme Kiele wol witlick is.

Des hefft de vorben. herr Vollert vor uns unde unseme radestand Arend Bekern sinem eeliken brodere, unseme denere, desse vorben. dre morghen ackers unde dat huss by deme r{oe}nnebome, by unser borch tho der steenborch und deme koehlhoue vort upgelaten, dar he eme syne n{oe}ghe vort vore maket hefft.

Hirumme so gheue wy vor unss unde unse eruen ouer deme vorben. Schenckin und sinen eruen de macht, mit dessen dreen morghen ackers unde mit deme huse tho doende, wes en darmede behegelick is.

Des tho gr{oe}terer witlicheit hedde wy hertog Alff vorben. unse jnghesegel und witschap vor dessen bref ghehenget laten, na Godes bort verteinhundert jar darna an deme ver und twintigsten jare, des sondages vor pinxten.