Tekst efter A.
Jk vrüwe Jütte Clawes Lembecken moder[1] vnde myne er{uv}en bekennen vnde be tughen openbare jn dessem breue . dat ik schuldich byn van rechter wytlicker schult der stad to Koldinghe achtentich lubesche mark also to Lubeke vnde to Hamborch ghinge vnde gheue synt / ♦
Vor desse vorscre{uv}ene achtentich lubesche mark sette ik vrowe J{uv}tte vor benompnet der stad to Koldinghe to pande alle myne rechticheyt vppe Brendekerre marke myt . acker myt wysche . myt weyde . vnde water . myt holtinghe . nycht dar van vt ghenomen also dyt g{uv}t vmme vnde vmme jn allen steden be leghen ys . ♦
Men doch scholen se nycht eken edder b{uv}ken ha{uv}wen laten vppe dessem holte . dat vppe dessem vorbenomeden ghude lycht edder jn ienigherleyghe wys vorder{uv}en[2] laten . ♦
Vnde wes de vorbenomede stad Koldinghe van dessem vorbenomeden gude vp boren edder neten de wyle dat dat ere pand ys dat schal men nycht aff slan in desser vorbescre{uv}ener[3] summen penninghe . men dat vorbenomede holt scholen se anders nycht by don wenne also vorscreuen ys ♦
Vnde wanne ik vrowe Jutte vorbenomed vnde myne er{uv}en dyt vorbenomede ghud losen wyllen so schal ik edder myne er{uv}en de losinghe kundinghen vppe Tustorppe dinghe des ersten daghes vor S{uv}nte Johannes daghe mydensomer edder ere vnde gheuen dar na de vorscreuene achtentich mark der stad to Koldinghe jn den achten daghen na Sunte Merten to Koldinghe . ♦
Ok schal ik vrouwe J{uv}tte edder myne er{uv}en der vorbenomeden stad Koldinghe . dyt vorscreuene ghud . vnde pand vryghen vor alle de ghene de dar myt rechte vp spreken moghen vor en pand ♦
Alle desse vorscreuene stucke loue ik vrowe J{uv}tte vorbenomed vnde myne eruen stede vnde vast to holdende der stad to Koldinghe sunder alle hulpe rede . de my vrowe J{uv}tte vnde mynen eruen moghen to vromen komen edder der vorbenomeden stad moghen to schaden komen ♦
Des to tughe vnde merer vor waringhe . hebbe ik vrowe J{uv}tte vorbenomed vnde vrowe Eybe vse jngheseghele ghe henghet laten an dessen breff myt erbaren luden jngheseghelen den dyt mede wytlik ys . also Por Stych . Erick Petersson . Emeke Esebernsson vnde Henneke Godendorp / de dar gheuen vnde screuen is na Godes bort verteynhundert iar dar na in deme xxvij iare in des hilghen lichames daghe ♦
I perioden frem til 30. juni 2021 vil redaktionen udelukkende udarbejde tekster.