Tekst efter Aa.
Gnedigen leuen heren ♦
Juwe vrund de gij dar toüoget hadden de hebben vppe juwer gnade vorbeterend / der d{ee}linghe[1] des hertochrikes to Sleswijck alzo üorramet / dat Gottorpe mid der nascreuen tobehoringe / een deel wesen schulle / alze Risebuherede[2] mid Ekelenüorde . Sorkeherede mid Croppe Arnsherede . Selke Bustorpe . D{ee}newerd . Eggerste Ghudeb{uv} Vleckeb{uv} Strukstorpherede Sleesherede . de vere to dem Moessunde Sleswijck Sunderghusherede . vnde dre dorpe in dem kerspele to B{uv}nstorpe alze Lembeke Borchstede vnde Schulendorpe vnde dre land in Eyderstede ♦ Desse herede vnde gudere vorscreuen mid den molen dar tobehorende sind vorslagen in renthen . vppe ij dusent mark vjc mark vnde lij mark penninge ♦
Dat ander deel schal wesen Vlensborgh vnde dar to desse nascreuen herede vnde ghudere . alze Tzijlt vnde Phore Norgusherede Wijkesherede Vggelherede Hüsbuherede Nüherede vnde de Nordstrand mid Pilwormingherede ♦ Desse herede vnde gudere mid den molen dar to belegen sind vorslagen in renthen vppe ij dusent mark vnde vɉc mark vnde iij mark penninge ♦
Vnde desse erbenomeden twe slote mid den vorscreuen tobehoringen schullen / to erffdele nicht gedelet wesen . de moge gij to iaren na juwer beider willen vnde behegelcheit vmme setten vnde vmme ghan laten / vnde ein jewelk mach ghestlike leene vorlenen de eme in sinen iaren vnde an sinem deele voruallen sunder vnwillen des anderen ♦
Ok so is vorramet vmme den bergh to Vlensborgh to buwende / alzo dat beide heren dat buwet bekostigen schullen / men in wes deel Vlensborgh kumpt de schal sine tijd den arbeides luden de koste gheuen dem anderen vngerekent[3] ♦
Vortmer vmme Sunderborgh vnde Tunderen js vorramet dat Sunderborgh mid Norborgh vnde mid der tobehoringe beter sij / wen Tunderen . jodoch so schullen de beiden slote alze Sunderborgh vnde Tunderen / ein islik mid siner tobehoringe gedeelet wesen vnde bliuen to eruende / vnde vmme de beteringe to Tunderen ieghen Sunderborgh sette wij to juwes sulues rade vnde to juwen willen ♦
Vmme Oppenra is vorramet dat Oppenra noch tor tijd vngedelet schulle bliuen to behoff juwer beider ♦
Vortmer js vorramet vmme dat land to Holsten jft juwer beider gnaden dat beheghelk is dat Segeberge mid den steden sloten vnde landen / de eme in delinge juwes vaders vnde siner brodere milder dechtnisse togelecht werenn / ein deel bleue / alze de stad vnde slot to[4] Segheberge mid der vogedie de stad tor Nygenstad / de kerspele Seelente Gijkouw de Crempen bij der Nygenstad / dat dorp tom Grotenbrode de stad vnde slot to Rendesborgh . vnde de Tilenborgh vnde dat kerspel to Nigemunster mid deme haluen geleyde ♦
Vnde dat Plone mid den sloten steden vnde landen de eme in der suluen delinge to gelecht weren / dat ander deel bleue alze slot vnde stad to Plone dat land to Oldenborgh / de stad to Luttekenborgh de stad tor Haüen / dat land to Vemern mid dem Glambeke / de Hanrouw / de kerspele . Hademerschen vnde Stheneuelde . dat slot Hazeldorpe mid aller tobehoringe ♦
Vmme dat drudden deel juwers vaders delinge vnde siner brodere js vorramet dat men dat drudde deel deele in twe deel . dar men de[5] ersten twe deel alze Segeberge vnde Plone etcetera na gebore mede vorbetere ♦ Dat drudde deel was do / de Kijl Nygenmunster[6] Trittouw Odeslo dat land to Stormeren Itzeho de Osterhoff vnde enem jewelken in sinem deele beholde de lenware ghestliker leene ♦
Vmme vnwillen vnde mishegelcheit de eer twischen der herschop gewesen is . vmme gestlike leene / to üormidende js vmme des besten willen vorramet dat <de>[7] ghestliken leene bynnen der stad Hamborgh vnde bynnen Vthin schullen bliuen bij Segeberge / vnde de gheestliken l{ee}ne bynnen Lubeke schullen bliuen bij Plone ♦
I perioden frem til 30. juni 2021 vil redaktionen udelukkende udarbejde tekster.