Tekst efter Urkundensamml. l.l.
Wii Alff unde Gerd van Gots gnaden hertogen to Sleszwig etcetera bekennen unde betugen apenbar in desseme breve vor alle den jennen de ene zeen edder horen lesen, dat mid unser witlicheyt unde vulbordt, de wii vor uns unse erven unde nakomelinge darto geven hebben unde geven in macht desse breves, unse truwen lude unde menicheyt in unsen dorperen Osterhusen unnde Westerhusen wonnafftich sick alle mit endracht eren erven unde nakomelingen in tokomenden tiiden inwonre der vorscreven unser dorpere ere stande erve liggende grunde unde de stede unde de grunde dar se uppe wonnafftich sint mit aller tobehoringe rechtliken unde redeliken oppe deme dynge to Husem vor unseme vogede apenbar hebben vorplichtet unde schuldenere maket in allen artikelen unde stucken unde an aller wise alse hir nagescreven steyt:
Also dat se alle jare to ewigen tiiden scholen geven deme kerckheren to Milstede unde sinen nakomelingen to der capellen, de de vorscreven unse meynicheyt in sunte Lamberti des hilgen bisschoppes ere buwen unde setten willen, XX lubescher marck penninge jarliker rente also to Lubeke unde Hamborch genge unde geve sint unde dar eyn gud man deme anderen in deme lande to Holsten vul mede don mach, alle jar uppe sunte Mertens dach an vortoch an redeme golde tosamende an eneme summen wol to betalende.
Wert dat in natiiden de sulven unse lude unde meynheyt edder ere nakomelinge inwonere to Husem de vorscreven XX marck lubescher pennynge jarliker rente nicht betaleden in den veer hilgen dagen to wynnachten negest na deme sunte Mertens dage alse se sick vorplichtet hebben, so scholen se altohant na den veer hilgen dagen to winnachten plichtich wesen de vorscreven rente dubbelt to betalende deme kerckheren unde sinen nakomelingen vorbenomed alse XL marck lubesch der sulven munte an eneme gantzen summen; vor welke XL marck ze sick in allen artikelen uppe deme vorscreven dinge vorplichtet unde vorbunden hebben alse vorscreven is van den XX marck.
Unde qwemet denne dat God vorbede, dat desse vorscreven unse lude unde menicheyt desse XL marck van der tiid an alse se de plichtich weren to betalende in der vorscreven wise wente oppe den sondach to vastelavende negest darna tokomende nicht betaleden, so hebben se dat vorwillekort, dat men an den kerken, wor se edder etlike van en komende werden, vor en swigen schal unde also lange sunder godes denst wesen scholen, dat se de vorscreven XL marck betalt hebben vullenkomen.
Alle desse vorscreven loffte unde stucke hebben de sulve unse lude vor sick ere erven unde nakomelinge inwonre to Husem mit unser witlicheyt unnde vulbordt uppe de erven liggende grunde unde tobehorige to Husem lovet screven unde vorsegelt, ewich to holdende ane arch, unnde wii Alff unde Gherd hertogen vorbenomed unse erven unde nakomelinge dar nummer ane hinderen.
Wert dat de vorbenomede unse lude ere erven unde nakomelinge biihoeff hadden to pandende etlike inwonere to Husem de to deme vorsprakene gelde schuldich worden, des scholen se van unser unde unser erven unde nakomelinge wegen macht hebben enen isliken oppe syn andeel to pandende sunder ander orloff, unde scholen darane wedder uns unse erven unde nakomelingen edder unsen voget nicht don.
Ock schole wii unse erven edder nakomelinge unde willen unns nicht unde nemant van unser wegen schal sick bekummeren mit der leenware der sulven cappellen.
Datum anno Domini MCCCCXXXI dominica oculi etcetera.
I perioden frem til 30. juni 2021 vil redaktionen udelukkende udarbejde tekster.