Tekst efter Hanserec. l.l.
Unsern fruntlichen grus myt beheglichem willen czuvor.
Ersamen lieben frunde.
Als die euwirn, die nehest mit den andern steten diss landis bey unserm hern homeister[1] czu tage gewest syn, wol mogen ingebracht haben, wie unsir herre homeister dy sache, dy die stete myt im handelten, als van der freyheidt und privilegien wegen, die diss land und die gemeyne hense in den richen czu Dennemarken von alders gehat hat[2] , czu im nam bis czu der vorsampnunge seynir gebittiger, so welde her denne eyne gutliche entwert doruff geben.
Also, lieben frunde, haben wir am nehest vorgangenen dinstage[3] unsirs rates eldesten umbe der vorgeschreben und ouch andern sachen willen czu dem Elbinge gehabt, do unsir herre homeister mit synen gebittegern vorsamelt was, der den unsern, in kegenwertikeit seynir gebittiger und etlichen des rathes czum Elbinge, sulche entwert hat gegeben: Wer is sache, das die stete der gemeynen hense uff eynen tag czu sampne komen wurden, und do vor das gemeyne beste von der ganczen hense wegen etwes eynen wurden und verramen, das wir uns denne doruss nicht czihen sulden, sunder das beste dor inne helffen rathen. Disselbe haben wir den hern von Lubeke von der stete wegen diss landes in der besten und bequemsten weise, als wir mochten, vortan vorschreben.
Gote seit befolen.
Geschreben[4] czu Danczik under unserm secrete am palmen obende anno etcetera 31.
Und[5] bitten disselbe den hern czum Colmen czu vorkundigen.
Rathmanne Danczik.
I perioden frem til 30. juni 2021 vil redaktionen udelukkende udarbejde tekster.