1434. 15. juni. Vordingborg

Tekst

Universis Christifidelibus ad quorum notitiam presentes littere pervenerint, Naffno dei gratia episcopus Ottoniensis caritatem continuam in domino cum salute. Pium et gratum obsequium deo impendere credimus, quotiens ejus fideles ad pietatis opera excitamus. Cupientes igitur, ut Kalende custodum ecclesiarum in Fuælsehæræt Lalandie in honorem omnium sanctorum inchoate, in suo honore et stabilitate valeant permanere, omnibus vere penitentibus et confessis, qui missarum et vigiliarum sollempnia, quociens in anno post discessum alicujus fratrum de dictis Kalendis celebrantur, visitaverint, seu qui ad sustentationem earundem Kalendarum in testamento manus porrexerint adjutrices, seu qui in domo convicii pro refrigerio animarum, dummodo illa tria cantica, scilicet De Sancta Trinitate, De Domina Nostra, et De Omnibus Sanctis a clero decantantur, deum pie exoraverint, et qui post commestionem, dum super defunctis fratribus et sororibus exoratur, devotos se habuerint, vel qui ad luminaria aliquid donaverint, quociens premissa seu aliquid premissorum devote adimpleverint, totiens de omnipotentis dei misericordia et beatorum Petri et Pauli apostolorum ejus auctoritate confisi, quadraginta dies indulgentiarum de injunctis sibi penitentiis misericorditer in domino relaxamus. Datum anno domini millesimo quadringentesimo tricesimo quarto, ipso die beatorum Viti et Modesti martyrum, nostro sub secreto presentibus appenso. Nos vero Naffno supradictus, confrater dictarum Kalendarum, omnia et singula jura, privilegia et statuta earumdem per presentes pie statuimus, approbamus et in sua permanentia ratificamus eternaliter duratura.