Udtog efter Hanserecesse l.l.
Querele egregii domini, domini Pauli de Rosdorph , ordinis beate Marie Iherosolomitanorum magistri generalis, ac civitatum et opidorum[1] universarum partium orientalium in confederacione, que vulgo Allemanorum hansze nuncupatur, existencium nomine suorum mercatorum contra serenissimum principem, dominum Henricum , regem Anglie sextum, suosque subditos etc.
...
20. Item conqueruntur consules, proconsules, cives et inhabitatores civitatis Hamburgensis, quod anno Domini 1427 cum ipsi nomine illustrium principum ducum Sleswicensium suorum dominorum in arduis guerris et discensionibus cum illustrissimo principe domino Erico , regnorum Dacie, Swecie, Norwegie etc. rege, predictorum suorum dominorum jura defendendo et injuriis resistendo fuerunt constituti, venerabiles consulatus Lubicensis, Luneburgensis et Wysmariensis civitatum, que dicto domino regi Dacie gwerras et hostilitates anno eodem intimabant, amicabiles litteras serenissimo domino Hinrico regi Anglie sexto destinarunt, humiliter et attenter supplicantes universos et singulos sue regie majestatis subditos ac mercatores de quacunque nacione essent in regno suo Anglie[2] existentes graciose fideliterque muniendo, ne cum navibus, bonis et mercandisis suis ad regna supradicta dictum dominum regem fortificando se declinarent quoquo modo; si quis autem illorum post municionem prescriptam quidquam in contrarium attemptaret et in navibus, bonis et mercandisis suis dampna, gravamina seu inconvenientia alia de nostratibus sustineret[3] ad illorum dampnorum, gravaminum et expensarum refusionem vellent esse non astricti. Qua peticione, ut premittitur, facta dicti domini regis Anglie fideles et regnicoli prenarrato domino regi Dacie cum armatis viris et navibus operam dederunt[4] ac sub bona fide una cum Danis nostrates in mari hostiliter invaserunt, de quibus ducentos interfecerunt ac sexcentos captivaverunt, nec non arma, naves et bona ad dominum ducem Barnemen , quem cum omnibus suis complicibus nostrates debellaverunt et quasi captivaverunt, dicti Anglici et Dani secum penitus receperunt. Que dampna proconsulibus, consulibus, civibus et inhabitatoribus predicte civitatis Hamburgensis non contigissent, si Anglici prelibati operam Danis non dedissent. Ista vero dampna ad 100000 nobulos se extendunt[5] .
...
I perioden frem til 30. juni 2021 vil redaktionen udelukkende udarbejde tekster.