Tekst efter Aa.
Wy Erik . van godes gnaden der rike Denemarken Sweden . Norwegen der Wende vnde Gothen koningk vnde herteghe to Pomeren . bekennen vnde betůgen openbare in vnde mit desseme vnseme openen breue vor alsweme dat wi ghegheuen hebben . vnde gheuen in guden truwen in craft desses breues den erliken sendeboden der stede . Lubeke Hamborg Lunenborg vnde Wismer . de de suluen stede vmme vnser bede unde leue willen mede senden to deme daghe to Calmeren in vnse erbenomede rike to Sweden een seker vnde geleyde to watere vnde to lande . ♦
Also dat se vnde alle de yenen de se mit sik bringen to deme vorscreuenen dage mit eren schepe \ haue vnde guden seker vnde velich wesen scholen \ vt wert to deme vorscreuenen daghe vppe deme [suluen] daghe vnde wedder van dar \ bette in ere beholt . vor vns . vnde alle de yenen . de vmme vnsen willen don vnde laten scholen vnde willen sunder arch . ♦
Vnde hir vmme bede wi strengeliken . alle den vnsen vnde alle den [der] wi mechtich sin . ghestliken vnde werliken samentliken vnde eneme yeweliken besunderen . dat se teghen dit vorscreuene vnse koninglike geleyde nenewys endon . bi vnser koningliken hulde vnde bi vormydinge vnser koningliken wrake sunder dat se de vorscreuenen sendeboden vnde de eren eren vnde vorderen to watere vnde to lande mit dem beste . wor se moghen . ♦
Weret ok . dat de vorscreuene sendeboden mit den eren anderswor . in vnsen riken to quemen in desser vtreyse unde wedder reyse . dar scholen se in vorscreuener wijse ok geleydet sin to watere vnde to lande \ ♦
Vnde desses to merer tuchnisse der warheit hebbe wi koningh Erik . erbenomet vnse secrete jngezegel . willichliken henget heten vor dessen bref . de gegeuen is na der bord . Christi . vnses heren verteynhundert jare . vnde dar na an deme sosvndedruttegesten jare vppe den dach divisionis apostolorum ♦
I perioden frem til 30. juni 2021 vil redaktionen udelukkende udarbejde tekster.