1436. 7. september. Kalmar slot

Tekst

Wy Erik , van Godes gnaden to Dennemarken, Sweden, Norweghen, der Wende unde Gothen koning unde hertoge to Pomeren, don witlik unde bekennen vor allesweme, de nw zint unde tokomende werden, in unde mit desseme unserm openen breve, dat unse^[1] dat unse] dat wy unsen, A. leven borgher unde undersaten ud unsen kopstedern to Pomeren, alse ud Stargharde unde Trepptowe, hebben an uns werven laten unde uns ghebeden, umme eyne vitte en to ghunnende uppe unser vischerye to Drakør by der Prutzschen vitte to den lemkulen wart unde dat de brodere van sunte Augustyns orde to Stargharde moghen buwen dar ene capelle uppe der sulven vitte: dat hebbe wy en nw ghund unde tolaten na unser redere rad, de nw by unsz weren, umme eres truwes denstes willen, alse se uns unde unsen ryken hir to ghedan hebben, unde wy unde unse nakomelinge koninge unde de ryke^[2] de ryke] den ryken, A. tho en in tokamenden tiiden uns vorseen, dat se truwelken doen unde bewisen scholen.

Ok ghunne wy en, to hebbende unde to brukende sodane pryvilegia unde vryheide uppe unse vorbenomte vischerye unde hervestmarket, also de van Lubeke unde de andern hensestede darsulves hebben unde gheneten, doch in sodaner mate, dat se uns unde unsen nakomelingen koninghen doen darvan sodane rente unde rechticheit, alse andere bedderve lude uppe der sulven vischerye darvore gheven unde doen van erer vitte unde bodesteden, ok liker^[3] liker] leker, A. wis umme tollen unde andere rechticheyt.

Darumme vorbede wy alle mann unde to sunderghen unsen vogheden unde amptluden, en hirane to hinderende in sulker mate, alse vorgheroret ys, by unser konickliken hulde unde gnade.

Datum in castro nostro Calmaren regni nostri Swecie anno Domini millesimo quadringentesimo tricesimo sexto in profesto nativitatis Marie virginis nostro sub secreto presentibus appenso.