Tekst efter A.
Sacrosancta generalis synodus Basiliensis in spiritu sancto legitime congregata universalem ecclesiam representans dilectis ecclesie filiis nobilibus marescallo et dapifero necnon universis et singulis militibus militaribus et aliis nobilibus regnorum Swecie Dacie et Norwegie salutem et omnipotentis dei benedictionem . ♦
Sane pridem ecclesia Upsalensis per obitum bone memorie Olavi archiepiscopi Upsalensis qui extra Romanam curiam diem clausit extremum pastoris solacio destituta / dilecti ecclesie filii Olavus archidiaconus et capitulum ejusdem ecclesie vocatis omnibus qui voluerunt potuerunt et debuerunt electioni futuri pastoris commode interesse ut moris est convenientes in unum / ac a jure statutis temporibus necnon forma decreti nostri in hiis observatis unanimiter deliberarunt in electionis hujusmodi negocio per viam scrutinii fore procedendum / necnon delectis ecclesie filiis archidiacono predicto ac Jacobo Nicolai et Egardo Conradi canonicis ejusdem ecclesie qui ut moris est singulorum vota inquirerent / eaque fideliter in scriptis redacta publicarent assumptis iidem archidiaconus et canonici onus assumptionis exequentes comperuerunt (!) quod tam ipsi quam alii jus eligendi habentes in venerabilem Nicolaum episcopum Wexionensem concorditer vota sua direxerunt postulantes ipsum episcopum unanimiter et concorditer in eorum ecclesie prefate archiepiscopum et pastorem ipseque episcopus presentato sibi postulacionis hujusmodi decreto / postulacionem ipsam ordinacioni nostre duxit submittendum ♦
Nos postulacionis hujusmodi negocium nobis desuper expositum et illius decretum nobis etiam per nuncios prefati capituli presentatum dilectissimis ecclesie filiis Ludovico tituli sancte Cecilie Arelatensi / officium cancellarie nostre regenti / et Dominico tituli sanctorum Johannis et Pauli Terraconensi wlgariter nuncupatis sancte Romane ecclesie presbiteris cardinalibus / necnon Amedeo Lugdunensi et Nicolao Panormitano archiepiscopis apud nos constitutis / ad finem et effectum nobis desuper referendi comisimus examinandum diligenter ♦
Demum nobis solerti et diligenti examinacione per dictos cardinales et archiepiscopos prehabita / ac nobis super hoc in congregatione nostra generali fideli relacione per organum prefati archiepiscopi Panormitani facta / postulacionem ipsam comperimus de persona ipsius episcopi ad dictam ecclesiam minus canonice quo ad juris positivi solemnitates fore celebratam . ♦
Nos nichilominus advertentes quod ipsa postulacio canonice fuit jure naturali inspecto utpote unanimi consensu habencium eligere seu postulare celebrata / necnon ad ipsum episcopum qui congregacionem nostre incorporatus existit et aliqua<n>diu nobiscum in vinea domini sollicitos impendit labores consideratis grandium suarum virtutum meritis quibus personam suam dominus eorum largitor multipliciter insignivit / et de quo fidedigna testimonia nobis etiam perhibebantur et quod regimini ecclesie Wexionensis hactenus laudabiliter prefuit prefatam Upsalensem ecclesiam sciret et posset auctore domino salubriter regere et feliciter gubernare nostre consideracionis dirigentes intuitum ac intendentes quod de persona sua tam ipsi ecclesie Upsalensi quam gregi ejus dominico salubriter provideretur postulacionem hujusmodi / cum disposicio ecclesiarum cathedralium et aliarum propter suspensionem domini Eugenii pape iiii ab administracione papatus in spiritualibus et temporalibus ex certis et justis causis per nos factam ad nos devoluta existat / duximus admittendam atque per alias litteras nostras admisimus supplentes nichilominus omnes et singulos defectus siqui intervenerunt in eadem / ac ipsum a vinculo quo ipsi ecclesie Wexionensi preerat tenebatur auctoritate universalis ecclesie absolventes prefate ecclesie Upsalensi prefecimus in archiepiscopum et pastorum et ad eandem ipsam transtulimus et sibi transeundi licenciam tribuimus / curam et administracionem ejusdem Upsalensis ecclesie sibi in spiritualibus et temporalibus plenarie comittendo / sperantes indubie quod dirigente domino actus suos ipsa ecclesia Upsalensis per sue circumspectionis fructuosum studium regeretur utiliter et prospere dirigeretur et grata in eisdem spiritualibus et temporalibus susciperet incrementa / ♦
Quocirca universitatem vestram ac omnes et singulos rogamus et exhortamur attente / quatinus eundem postulatum et prefatam ecclesiam Upsalensem sue cure commissam habentes[1] pro universalis ecclesie quam representamus reverencia accuracius recommendatos ut per vestri favoris assistenciam / in commisso sibi pastoralis cure officio possit deo auctore melius prosperari . vosque proinde eterni vite premium et ejusdem universalis ecclesie benivolenciam mereamini consequi longevam ♦
Datum Basilee kalendis octobris anno a nativitate domini millesimoquadringentesimotricesimooctavo ♦
I perioden frem til 30. juni 2021 vil redaktionen udelukkende udarbejde tekster.