1421. 5. februar. Rom, San Pietro

Tekst

Martinus etc. venerabili fratri episcopo Lincopensi salutem etc.

Intenta semper salutis operibus apostolice sedis circumspecta benignitas ea, que pro divini cultus augmento, christifidelium animarum salute et sacre religionis fecundatione salubri provide facta sunt, pio favore prosequitur et ut illibata persistant, libenter, cum ab ea petitur, sui muniminis corroberat firmitate.

Exhibita siquidem nobis nuper pro parte dilectorum filiorum abbatis et conventus monasterii in Owith premonstratensis ordinis Lundensis diocesis peticio continebat, quod olim bone memorie Eskillus archiepiscopus Lundensis, desiderans diem extremi judicii pietatis operibus prevenire et de bonis sibi a deo collatis seminare in terris, unde multiplicatum fructum recolligere posset in celis, prefatum monasterium de hujusmodi bonis suis fundavit et illi de dilectorum filiorum capituli Lundensis expresso consensu inde Skogheret et Baraheret dicte diocesis villarum decimas, que tunc ad mensam archiepiscopalem Lundensem legitime spectabant, in partem dotis sue donavit et assignavit ac deinde fundationem, donationem et assignationem hujusmodi per nonnullos Romanos pontifices predecessores nostros obtinuit auctoritate apostolica confirmari, quodque eciam postmodum bone memorie Absalon et Andreas ac Esgerus archiepiscopi Lundenses, prefati Eskilli archiepiscopi successores, easdem fundationem, donationem et assignationem auctoritate sua ordinaria successive approbarunt et confirmarunt, ac insuper idem Esgerus archiepiscopus abbati et conventui predictis, ut eo commodius sustentari et sibi incumbencia onera supportare possent, omnes pecuniarum trium marcharum causas arduis tamen exceptis super universos habitatores et incolas loci de Ferseheret ejusdem diocesis, que eciam tunc ad eandem mensam legitime spectabant, de simili dictorum capituli consensu sub certis modis tunc expressis pie contulit et concessit, prout in apostolicis et diversis aliis dictorum archiepiscoporum eorum eciam sigillis munitis desuper confectis literis plenius dicitur contineri.

Quare pro parte dictorum abbatis et conventus asserentium, quod ipsi in dicto monasterio post illius fundacionem hujusmodi divino obsequio mancipati decimas per ducentos et pecuniarias summas prefatas per centum annos et ultra pacifice et quiete perceperunt ac in suos et ejusdem monasterii usus converterunt, prout percipiunt et convertunt de presenti, nobis fuit humiliter supplicatum, ut fundationi, donationi, assignacioni, confirmationibus, approbationibus et concessioni predictis et inde secutis pro eorum subsistentia firmiori robur apostolice confirmacionis adjicere de benignitate apostolica dignaremur.

Nos igitur de premissis certam noticiam non habentes hujusmodi supplicacionibus inclinati fraternitati tue per apostolica scripta mandamus, quatenus, si ita est, fundationem, donationem, assignationem, confirmationes, approbationes, concessionem et inde secuta hujusmodi auctoritate nostra approbes et confirmes.

Datum Rome apud sanctum Petrum nonis februarii anno quarto.