Tekst efter Sudendorf l.l.
Allen kurforsten vnd forsten geistligen vnd werntligen, den desse breff vorkompt, embede wy Allef, van Godes gnaden hertzoge to Sleswick, greue to Holsten, Stormeren vnde to Schowenborg , vnsen willigen vnde vruntliken denst.
Hochwerdigen, dorluchtigen vnd hochgebornen forsten.
Wy doen iv weten, dat an vns ghekomen is van wegene des hochgebornen forsten vnd heren, hern Eriks, to Sassen, to Enger vnd to Westphalen hertoge vnd pfaltzgreue to Sassen , vnses leuen heren vnd oemes, dat he vnd syne brodere, hertoge Magnus , hertoge Bernhard vnd hertoge Otte , ok vnse leuen heren vnd oeme, dat deseluen forsten van deme olden stamme vnd geboirde nicht geboren en solen wesen, als wandages vnse leuen heren, hertoge Rodolff vnd hertoghe Albrecht to den ergenanten landen, hertochtumen vnd pfaltzgrafschafften geboren syn wesen. Vnd darvmb sole de vorgenante hertoch Erik , de der eldeste is vnder den ergenanten synen broderen, alle vnse leuen heren vnd oeme, to den vorgenanten hertochtumen, pfaltzgrafschefften vnd ertzemarschalkampten nyn recht hebben.
Darvmb der warheit vnd rechticheit to sterkunge vnd getuchnisse spreke wy by vnser samwitticheit vnd vnsir eren, werden vnde eyden, dat wy van vnsen vorfaren, elderen vnd van velen erbaren luden gehort hebben vnd vns ok wol seluen witlich is vnd openbaer, dat de ergenanten fforsten, hertoge Erik , de der eldeste is, vnde andere syne brodere vnd de vorgenanten hertogen Rodolff vnd hertoge Albrecht seligen ere elderen van twen broderen vnd eynem blote vnd stamme geboren syn vnd van namen, helme, schilde vnd banner de negesten syn.
Desses alle to eynem waren orkunde hebbe wy vnse eigen jngesegel an dessen breff laten hangen.
Anno domini millesimo quadringentesimo vicesimo tertio, des midwekens jn den pinxten[1] .
I perioden frem til 30. juni 2021 vil redaktionen udelukkende udarbejde tekster.