1428. 4. januar. Wismar

Tekst

In nomine sancte et individue trinitatis, amen.

Wy Katherina , van Godes gnaden hertoginne tho Mekelenborch, gre{uo}inne to Zwerin, tho Stargarde vnde Rozstok der lande vr{uo}we, bekennen vnde bet{uo}gen openbare in desseme breue vor alsweme, de ene z{ee}n edder lesen horen, vor vns vnde vnse kyndere, heren Hinrike vnde heren Johanne , van der vorscreuen gnade Godes hertogen tho Mekelenborch vnde greuen to Zwerin etcetera, der wii vormundere syn, vnde vor ere eruen, dat wii vormyddelst rade vnde vulbort vnser leuen getruwen herschop rade hebben angeramet myd den erliken borgheren vnde inwonren an vnser stad Wysmer:

Also vmme de twedracht vnde vnwillen, de dar is gewesen th{uo}schen deme rade, den borgheren vnde menheyden also van der tosathe weghene, de de vorscreuen rad ghemaket heft myd deme konynghe van Dennemarken vnde synen landen to ewygen tiiden zunder vnse vnde sunder vnser herschop rade offte vulbort vnde sunder vnser vorscreuenen borger willen, wischop efte vulbort, dat vns de erbenomeden vnse borgere tho kennende gheuen, also schaden, brekeligheit, de daraff ghekomen is vnde noch aff komen m{uo}chte, dat God affkere, in tokomeden tiiden, dar wii myd vnser herschop rade zee vmme entset hebben vmme zodanen breke vnde hynder vnser herschop vnde vnser vorscreuenen stad vnde vmme des menen besten willen, also dat wii den suluen vorscreuen rad, de van der herschop gheset was, den van deme vorscreuen beuele vnde herligheit beuelen was vnde macht, dar zee to zettet weren, hebben myd vnsen kinderen vnde heren, hertoghen Hinrike vnde hertogen Johanne vorgescreuen, vnde herschop rade wedder affgezettet vmme des erbenomeden vorbundes willen, dar sik de vorscreuen rad tho deme koninghe van Dennemarken vnde synen landen ane vorzeghelt vnde vorbreuet hebben tho ewiigen tiiden sunder vns vnde vnser herschop vnde zunder vnser vorbenomeden borghere willen, wischop ofte vulbort, wodoch de sulue rad, de seten heft, vor medeborghere to blyuende lik anderen borgheren, vnde de twedracht, vnwille thuschen en vnde den borgheren darmede vorlecht, men zee scholen antworden to eeren vnde to rechte, doch eres lyues velich to wesende van desser vorscreuenen zake van den borgheren edder herschop weghene erbenomet.

Also hebbe wii myd vnsen vorscreuen kinderen vnde heren vnde vor ere eruen vormyddelst vnser herschop rade myd ghantzen vrigen willen vnde wolbedachten mode an vnse vorbenomeden stad Wiismer yn de suluen stede des vthenomen rad es vorgescreuen enen^[1] enen] ene, A. vullenkomen mechtigen rad van borgeren vnde van ampten na vthwiisynghe der scrift, de vns de borghere vnde ampte antwordet hebben, dar zee angetekent weren, wedder zettet vnde stediget, setten vnde stetigen iegenwardigen in craft desses breues an aller vullenmacht, vryheiden vnde n{uo}tticheiden, also ere vorevaren den erbenomeden rad, stad vnde tobehoringe ye vrighest beseten vnde had hebben, vnde also yd van der herschop ie vrigest vorbreuet is dar nichtes buten beschenen; vnde desse breff schal den anderen breuen, de de rad vorgescreuen by sik hebben, van der herschop van Mekelenborch beseghelt, nergen ane to vorvanghe komen.

Vnde ok de yenen, de van den ampten an den rad werden koren, de scholen ere ampte ouergheuen, vnde de sulue rad eren vrigen kore to hebbende vnde to beholdende van borgeren vnde ampten in aller mathe, also vorgescreuen steit, also wan des van dodes weghene deme rade not vnde beh{uo}ff is.

Ok heft de sulue rad, den wii hir settet hebben, eede dan, also sik dat bort, vns, vnsen kinderen vnde vnser stad Wiismer vorgenomet.

Hirouer sint gewesen vnse leuen getruwen, der herschop van Mekelenborch raad, de dyt, also vorscreuen is, myd vns vnde vnsen vorscreuen kinderen vnde heren vnde vor ere eruen dedinghet vnde ghantzliken mede vulbordet hebben, also Wypert Lutzouwe , marschalk, her Bernd van Plesse , her Mathias Axekouwe , voghet to Zwerin, her Hinrik van Stralendorpe , rittere, Clawes Sperlingh , Otto Veregghe , kamermester, Henningh Haluerstad , vndermarschalk, Hinrik Molteke , Johan vnde Curd , brodere, gheheten van Plesse , Clawes van Ortze , Vikke Stralendorp van Criuitze , Johan Veregghe , Helmold Lutzouwe van Grabouwe vnde Hermen Kerkdorp van Gnoyen myd velen anderen erliken luden, gheislik vnde werlik, de wol louen vnde thuchnisse werdich synt.

Des to t{uo}ghe vnde warheyd alle desser verscreuen stukke vnde articule hebbe wii vruwe Katherina , hertoginne vergescreuen, vor vns, vnse kindere vnde heren erbenomet vnde vor ere eruen vnse ingesegel mid willen vnde ghantzer wytschop henghet laten vor dessen breff, de geuen vnde screuen is tho der Wysmer na der bort Godes verteyn hundert iare darna an deme achtevndetvynteghestem iare des neghesten sondaghes vor der hilligen driger koning daghe.