Tekst og arkivalske oplysninger efter APD l.l.
.. Exponitur s. v. pro parte .. Johannis Ottonis, alias Duker , ordinis fratrum minorum professoris, quod, licet ipse, qui dudum in provincia Dacie sub custodia Lundensi secundum morem dicti ordinis domum conventus Ystadensis ingressus fuit et in illa professionem per fratres ejusdem ordinis emitti solitam emisit regularem et, postquam in eodem ordine in dicta provincia per novem annos conversatus extiterit, per generalem dicti ordinis ministrum ad domum et conventum Osnaburgenses ejusdem ordinis provincie Coloniensis secundum morem predictum translatus et in eadem domo conventuatus fuerat, nichilominus guardianus et fratres ejusdem domus Osnaburgensis ex statutis et consuetudinibus domus Osnaburgensis predicte ad ipsius Johannis receptionem pro eo, quod idem Johannes defectum natalium patitur, minime teneri et ad id compelli non posse asserentes ipsum ad eorum conventum et ut conventualem inibi recipere denegant in hiis minime obtemperantes mandatis ministri antedicti.
Cum autem .. inter fratres predictos, quorum quisquis se utique alteri debet minorem exhibere, etiam merito ex quavis preeminaentia quis attolli aut ex simili defectu evitari non debeat, supplicat s. v. idem Johannes, quatinus ipsum in domo et conventu Osnaburgensibus predictis recipi et ibidem ut alium fratrem conventualem pertractari mandare sibique, ne per guardianum et fratres predictos odio vel rancore ab eadem domo pro eorum nutu ammoveatur, quod etiam sine dicti ministri consensu a domo ipsa per illius superiores transferri seu ammoveri nequeat, indulgere dignemini gratiose defectu predicto et contrariis quibuscunque non obstantibus.
Fiat. O.
Datum Rome apud ss. Apostolos 13. kal. martii anno 12.
I perioden frem til 30. juni 2021 vil redaktionen udelukkende udarbejde tekster.