Tekst efter Ab1.
Eugenius episcopus servus servorum dei dilectis filiis confessori generali et monachis fratribus nuncupatis monasterii in Marienbo per confessorem generalem in spiritualibus gubernari soliti ordinis sancti Augustini sanctisalvatoris nuncupati Ottoniensis dyocesis presentibus et futuris salutem et apostolicam benediccionem . ♦
Sacre religionis sub qua devotum et sedulum exhibetis altissimo famulatum . promeretur honestas ut ea vobis favorabiliter concedamus per que sicut pie desiderare videmini animarum salutis prodire valeat incrementum . ♦
Cum itaque sicut exhibita nobis nuper pro parte vestra peticio continebat tam ad monasterii vestri quod in insula quadam maribus altis undique circumdata situm est . et in cujus certa parte a vestri habitacione muris altis mediantibus semota penitus et distincta nonnulle ipsius monasterii moniales cum earum et illius abbatissa sub perpetua clausura pieque vite studio in spiritu humilitatis pro tempore domino deservire non cessant quam ad parochialem in Skemminge dicte dyocesis in eadem insula similiter consistentem ac ipsi monasterio canonice annexam ecclesias illarumque ac ejusdem monasterii emunitates quamplurimi utriusque sexus Christicole causa devocionis certis singulorum annorum temporibus convenire et ibidem eciam aliquando maris tempestate et aliis impedimentis causantibus per non modicum tempus moram trahere sint soliti . necnon interim hujusmodi devocionis fervore succensi eciam quandoque ex eis infirmi confessionis et eucharistie sacramenta in monasterio ecclesiis et emunitatibus predictis a vobis recipere concupiscant . ♦
Nos qui cunctorum fidelium salutem querimus animarum vestris in hac[1] parte supplicacionibus inclinati vobis ut tu fili confessor et singuli alii ex vobis presbiteri ydonei quos ad hoc tu fili confessor duxeris eligendos omnium et singulorum utriusque sexus fidelium ad monasterium ecclesias et emunitates hujusmodi causa devocionis ut prefertur pro tempore conveniencium et dicta sacramenta humiliter et devote requirencium confessionibus quociens opus fuerit diligenter auditis eis pro commissis eciam in casibus episcopalibus debitam absolucionem impendere et penitenciam salutarem injungere ipsisque hujusmodi eucharistiam per vicarios a vobis in eadem parochiali ecclesia pro tempore constitutos ministrare vota quoque si qua idem confitentes emiserint que impedimento obstante legitimo commode adimplere non poterunt in casibus videlicet tantummodo in quibus episcopi auctoritate ordinaria commutandi potestatem habent in alia pietatis opera prout illorum animarum saluti expedire videritis commutare libere et licite valeatis . quibuscumque apostolicis ac in provincialibus et synodalibus conciliis editis constitucionibus . necnon monasterii et ordinis predictorum juramento confirmacione apostolica vel quavis alia firmitate roboratis statutis et conswetudinibus ceterisque contrariis nequaquam obstantibus auctoritate apostolica tenore presencium de speciali gracia indulgemus jure tamen parochiali et quolibet alieno in omnibus semper salvo ♦
Datum Ferrarie anno incarnacionis dominice . mocdo tricesimo octavo . octavo idus septembris pontificatus nostri anno octavo . ♦
I perioden frem til 30. juni 2021 vil redaktionen udelukkende udarbejde tekster.