Heilsame grote mit wunsche alles guden in Gode tovorn.
Ersamen leven heren und gunstigen vrunde.
Juwen bref, an uns gesand, hebbe wi gutliken untfangen und wol vornomen, also juwe ersamicheit uns schreven heft, dat een geheten Clawes Doeck mit seiner selschop ein schip genomen hevet mit Nowerdeschen gude mit meer worden etcetera.
Des wetet, leven vrunde, weret sake dat wi dar jergen bi mochten nalen efte des gudes wes vornemen, efte de sulve selschop, dar wille wi uns vlitliken an bewisen, also uns dat to bored.
Ok, leven vrunde, wi hebben sendeboden an unses genedigen koninges Erics genaden gesand, umme ander werf, an uns liggende, den hebbe wi desse selve sake mede bevolen vord to settende, dat sine genade sodane lude nene vorheginge in den riiken en late bescheen, eft dat wesen mach.
Wes uns hir van to wetende werd, dat wille wi juwer ersamicheit wol screven.
Juwe ersamicheit spare God gesund to langen saligen tiiden.
Gescreven des sonavendes na sunte Bartolomeus dage, under unses stades secrete.
Borgermestere und raetmanne der stad Wysby uppe Godlande.
I perioden frem til 30. juni 2021 vil redaktionen udelukkende udarbejde tekster.