Tekst efter Aa.
Wi Erik van Godes gnaden der rike Dennemarken Sweden Norweghen der Wende vnde der[1] Gothen koning vnde hertughe to Pomeren ♦
Alze gi sendeboden der stede / de vnse viende worden vnde hir nw yeghenwardich synt / vns sint ansynnende ghe wesen / dat wy wolden vtstikken ene wise ener steden vasten vnde gantzsen sone / twischen vns vnde de vnsen an de enen / vnde jw vnde de jwen an de anderen syde / so hebbe wi ouer weghen mit vnseme rade / alze de jennen de dor bestandes willen vnser rike / vnde vndersaten mit jw[2] steden vorscreuen / jwen jnwoneren vnde kopmannen / vnde zo jwer stede j{uv}wer jnwoneren vnde jwes kopmans / mit vns / vnsen riken vnde vndersaten / an[3] vnsen danken vakene bekummert synt ghe wesen / vnde de de sake desses scheddelken vorderfliken kryghes dar wy van jw to ghenodighet[4] synt / vngerne bi vns wolden laten vynden / vnde na deme male / de woluart vnser rike vnde juwer stede vnderlanghe vns dunket allermeyst best{ae}n vormiddelst vruntliker endracht des eynen deles / van vns beyden myt deme anderen dele vorghescreuen / vnde vnser beyder dele vorderff vormiddelst vnderlangher twedrach grotliken wert ghesterket / vnde de menen lande der cristenheyt desser vorscreuen endracht moghen heylsamliken[5] gheneten / vnde so der twedracht swarliken moten vntghelden / alze dat de leyder bynnen desser[6] sul{uv}en[7] veyde an menghen vnschuldynghen beleghener vnde vromeder lande jnwoneren klegheliken ys bev{uv}nden vnde bes{uv}nder an der weldighen o{uv}erdat der vncristener sammelinge der kettere dar vele land vnde lude vormiddest gebrek notdurftigen[8] wedderstalles swerliken mede plaghet synt vnde ok alze desse jegenheyt sulk {ee}n ort ys wan wy in beyden[9] delen vorghescreuen vnderlangh endrachtigh syn / dat wy denne yeghen allerleye vromede anst{oe}te vnde oueruallinghe myt Godes hulpe vns sachte hebben to werinde / so hebbe wi vore an / dor des ghemeynen[10] vnde sedder dor vnser b{ee}yden dele vorscreuen bestandes willen / vns vorweghen ouer to z{ee}nde to desser tijd de vnbildelike ouertredinghe de gij an vns vnde an vnser kronen hebben[11] beghan den drepeliken schaden den gy vns hebben dan vnde den smeliken h{oe}n den gij vns hebben gheboden / vnd sint dar ouer doch nicht bestan / edder na juweme ruchte edder na juweme g{ov}de / edder na juweme vorder{uv}e / sunder na vromen vnde bestande vnser beyder dele vorghescreuen / wo wy des suluen ghelikes[12] an juw moghen vinden / ♦
Vnde alsus na mengher ouerweghynge vnde vndersokinghe der weghe de to so danyghen eweghen vromen vnde bestande vnde to so daner zone alze vorghescreuen ys denen mochten / so konne wy myt vnseme rade / nenen vasteren reddelykeren vnde bestentlikeren wegh edder wyse ghevinden men dat wy van st{uv}nden an / alle twedracht veyde vnde schaden an beyden syden vorgheschreuen / den enen ieghen den anderen bette to desseme daghe to vruntliken nedder slan vnde wech leggen d{uv}nket[13] jw o{uv}er nutter vnde beter zin dat man schaden na rechte vorbote an beyden ziden dat sette wy by jw vnde vortan na desser tijd vns holden an beyden[14] deylen to so daner tosate vnde vorbunde[a] alze wy malk anderen vnderdelinghe vor breuet vorseghelt vnde by vnsen tr{ov}wen ewychliken to holdende ghe louet hebben / zo dat wy vnde de vnsen / gij vnde de[15] juwen der suluen tosathe wlkomeliken gheneten / vnde dar vp eyn jewelik d{ee}l / van vns / des anderen lande ghebede / vnde hauene velych li{uv}es vnde gudes to vnde aff soken / komen vnde scheyden moghen / doch dat en jewelich in des anderen lande ghebeden vnde hauenen vorghescreuen do syn plycht vnde dar mede holden myt malkanderen ene stede vaste vnde eweghe vruntlike sone / doch dat gij vns vnde vnser cronen / vor de o{uv}ertredinghe vnde h{oe}n de van jw an vns began vnde vns ghe boden synt beden vnde d{oe}n enen mogheliken wandel alze gij van vns in gheliken stukken gerne wolden hebben / ♦
Ghescreuen vp vnseme slote Nykoping in Valster des dinghes daghes vor sunte Laurencii daghe des hilghen merteleres anno Domini mo cccco xxx ♦
I perioden frem til 30. juni 2021 vil redaktionen udelukkende udarbejde tekster.